Mark 13

Mono' Numuno Naba Di Goloso Ilizangumu' Izesu' Lo-ngimine' Gamazi

(Mataio' 24:1-2; Luka' 21:5-6)

1Izesu' mono' numuno nabauti' nolimivo izipahala zuhouti' mali'mo ti' lo lo-imine': Tisazo, ningezo. Numuno mene geheni amebe gehenidunu' numuno atoli'mine lamine' goloso gizikeve. 2Lavo Izesu' ti' lo lo-imine': Numuno naba mene ninge nabe. Ne'mi geheni've nene bili ngululubizi hulikevo geheni sita' ne'minesi ma bizi minamilisasive.

Soto' Iline' Initekumu' Izesu'ni Longo' I-dikevo Geni Mulumo Nite' Soto' Ilingumu' Nene Lo-ngimine' Gamazi

(Mataio' 24:3-14; Luka' 21:7-19)

3Ne'mine lo Oliva gololo' dizo mono' numuno nabala vele ize hulo neivo Petolole Zakobole Zohanele Adeleale angisevo' mini Izesu'ni longo' i-dani': 4Idi'ne laine' inite' nene nanihe' soto' ilive. Ido' a'mine gamazi nene gihile izelesa neivo noso molo nanite' nanite' soto' ilihe. Nemu' lo-lemezo. 5Ti' li longo' i-dikevo aza api' ogo ti' lo lo-ngimine': Ve malite gotine izi lengele'mize gopo ikelizaze. Lingine ehe' igi ningisa minilo. 6Evene' muki' nete nene neni' gulive'ne igi a'mine O'moso'mo do lungu' izelive lo nimiselelesa live ma nene na'mo nouve li go'ine izi evene' muki' ngele'mize gopo ilisave. 7Ido' lovo soto' neivo nigili ma ido' ebe' mala mala lovo soto' neivo ne'mi gamazi nigili ma upuho' igi golise gilamilo. A'mine inite' nene soto' oloseiha inite' vai' osu' liline' gamene naba nene a'mido' olihe soto' amive. 8Ido' misubo mau' vete misubo mau' vesi lovo hizilisave. Ido' guvelesi ve naba mali'mi zuhote guvelesi ve naba mali'mi zuhosi lovo hizilisave. Misubo ato atota mimi' oka' oka' oloseive. Ido' ga'na naba helaa' gamene nevosi nene soto' oka' oka' oloseive. Venelite izipe gidilisa mulumo api' igi gili gilika' gilika' i'mi i'mi navo alinge' izipaha'ine soto' oga' neive. A'mine'mine ogo a'mine mulumo nite' soto' iline' nene ha api' iline' nenako nemu' nene gilika' gilika' i'mi navo alinge' naza soto' olosuve. 9Ido' lingine nene ehe' igi ningisa minilo. Kanisole'nido' gonito' lengele'mizi milalisave. Mono' numu'ningu' lingibililisave. Nenita gi'mizi minangumu' ve li gonito' lengele'mizi milikevo guve'inesi ve nabaliti ve'nidokisi ngamani nabaliti ve'nidokisi oti mini neze monovo'ne li soto' igi li-ngimilisave. 10Ne'mine ilizani'za gamene naba olihe amivo gomu' nene mono' gamazi lamine' di hutile' igi li soto' i-ngimikevo evene' zuho ato ato' mukita voloseive. 11Ido' adido' di lengele'mizi gonito' milalisa navo ma nani gamazi lolone li gatine muki' gilamilo. Lengi' gamazi nomive. O'moso'mi Sikalahu' ei' gamazi lilisanaze. Asi O'moso'mo a'mine gamenelo' gatingu' do soto' iline' gamazivo' nene lilo. 12Ido' evene' nenikumu' gili ele'vole' amani' nete nene nenikumu' gili ele'vole' ave nene ngibili hililizave li gonito' ngele'mizi milalisave. Ee, mo uvo'ninge naku'ninge nilizani' netesi ido' ize'ninge me'ninge izipaha'ine zuho nilizani' netesi nene ha ne'mine ilisave. 13Neni' gulive'ne di minilizangumu' evene' muki' nete nene lengikumu' goloso gililisave. Ne'mine ilizaha evene' ma nenikumu' ha gili ele'vole' igi mini huli-nidamavo gamene naba iline' nene O'moso'mo do ngu' izeleseive.

Gamene Goloso Ma Soto' Oloseive Lo Nemu' Lo-ngimine' Gamazi

(Mataio' 24:15-28; Luka' 21:20-24)

14Alinge' nene ebe' do goloso iline' inite' gosele' nite' goloso gehepeve ma aloseive lani' ma nene a'mida minamilido' o neine' ebeta soto' oloseive. (A'mene gizuvoni' gamazi mene gato nogelo ma gatelinive gaza gele ngolo' lo gelezo.) Ne'mino soto' neivo niningi ma Zudaia misubo meu' nilizave lingine a'mido' geti golise golola vi halekilizave. 15Ehe, a'mine gameneu' nene silibe ogo minaa' nene nominako ve ma ingine numu'ine avitasi nilizadoti' nene ihe' numu'ninguko vi inite' mata'ine a'mingu' neine' nene di vamilisave. 16Ido' mingu' nilizadoti' nene oko'nido' inite'ine dalisa tine' mili numungu' amilisave. 17Agae, a'mine gameneu' nene izipaha'ine minine' venekumukisi ido' izipe amido' nizani' venekumukisi nene mo mulumo gele-ngedekuve. Ge'nebe goloso ilisave. 18Luvoni' inite' nene goline gameneu' soto' ogalive li O'mosola li minilo. 19Ne nanitekumu' ve. O'moso'mo inite' mata' do soto' idoti' idise none' gamenela mene mulumo alumo nite' naba ne'mine gomuta soto' amine' nenako api' ogo a'mine gamenelo' soto' oloseive. Ido' soto' ilidoti' nene alinge' gohi ma ne'mino soto' amoloseive. 20Guvelesi ve'mo a'mine gamene nene mine ha'na ogalive lo bele hukolove ma lamidiniko evene' hamo' ve'inesi ma minamadine'za ei' evenele ve lo ngele'mize kegesine' evenelemu' nene gelosa a'mine gamene nene mine ha'na alive lo bele hukolosa line' ve. 21A'mine gameneu' nene ve mali'mo ningilo. O'moso'mo do lu' izelive lo imiselelesa live aza mela neive lo ido' ningilo. Holela neive lo nolo-lingimivo ma nene gili imamilo. 22Ido' nanitekumu' ve. Evene' ma nete soza li linge ma O'moso'mo do lungu' izeline lo nimiselelesa live nouve li ido' linge ma O'moso'mi gamazi lo soto' oga' nouve polohete nouve li soto' igisa O'moso'mo ei' ve lo ngele'mize kegesine' evene've nene go'ine izekunivo le'metilizahe li ngele'mize gopo ilisa ato' nitekisi evene' golize laa' nitekisi di soto' igi ngelebizilisave. 23Mene inite' nene olihe soto' amivosa inite' mukikumu' gomu' nolo-lingimuze. Ehe, mo gizebo lamine' igi minilo.

O'mosolati' Ve Gihile Aline' Gamazimu' Lo-ngimine' Gamazi

(Mataio' 24:29-31; Luka' 21:25-28)

24A'mine mulumo nite' soto' ogo mineline' gamene osu' lavo alinge' nene holi'mi labanala nolihizivo ike'ni'mi labanala osu' lavo 25sonohi' nene okulumokuti' di'mozi' mozi' navo okulumoku' amuzo'inesi nite' nene mo'mongo' i gese' navo 26O'mosolati' ve gihile neni' nene amuzo naba do mino labana'nesi limuso avilelo' nolimuvo ningilisave. 27Ne'mine ogo angelo' ngimiselekuvo vi ngele'mize kegesuvoni' evene'ne nene misubo ato atoku' mini'mi minani' ebe' mukikuti' nene moni ngele'mizi di nubo i-ngidilisave.

Aneza Gamazi Gohuno Zalo' Lo Molo Line' Gamazi

(Mataio' 24:32-35; Luka' 21:29-33)

28Ido' gohuno zalo' lo molaloni' nene gili lamine' igi gililo. Lingine Zuda veti misubotida mene gohuno zaloti' sisive ho'lavo mo ho' gamene alitave li ningi gilaa' nave. 29Ido' a'mine'mine ogo a'mine nolo-lingimuvo nite' nene soto' neivo ma aza avito' ogo mo nene hetelelesa neive li ningi gililisave. 30Lamineto' ma lo-lengemeloze. Gililo. A'mine gamenelo' aleve nene ha mini olihe hili osu' lamavosi a'mine inite' muki' nene soto' ilisave. 31Okulumoki misubogi nene ha vi osu' lilisasine'za a'mine gamazi'ne nene mo osu' lamo ele'vole' ogo mineleseive.

A'mine Soto' Iline' Gamenemu' Nene Ve Hamolitesi Ma Gelamune Lo Izesu' Line' Gamazi

(Mataio' 24:36-44)

32Ne'mine o neine'za a'mine soto' iline' gamenemu' nene ve hamolitesi ma gelamune. Ido' Okulumokuko angelolesi nene gilamave. Ido' O'moso'mi gipele nazasi nene ma gelamuve. Me'neho ei' hamo' nene gele neive. 33Soto' iline' gamene nene nanihe' nolihe lingine ma gilamanaze. Ehe' igi gizebo igi minilo. 34Ido' ma ne'mino neive: Ve mali'mo venenga volosa numu've ebe've hulosa gelekele' izipahala inite'velo' gizebo ve hulo-ngedo hamo' hamo' nene gono ngemo gatedo' gizebo ilivemu' nene gatedo' gizebo lekeseve ilive lo lo-doosa vine' ve. 35Numuno meleho aline' gamene nene nivenga' alihe holuka' olo'mudise alihe go' nuvonuvo neivo nehe go' lo labana' elelesa neivo nehe lingine gilamanaze. Lite' lo ogo ingi nizavo ningalize. Nemu' gizebo lamine' igi minilo. 37Lengi' nolo-lingimuvoni' gamazi mene evene' mukikumukisi nene noluve. Gizebo lamine' igi minilo.